الثلاثاء، 26 يوليو 2011

تعليمنا أملنا


ساعات كده لما تقعد تفكر فى حال مصر بكره .. تلاقي العملية سودة قدامك أوووى .. أنا صراحة بيحصل معايا ده كتير .. أصل الرئيس المخلوع ده ماسبش حاجة هو ورجالته إلا لما بوظوها بضمير أوووى , تأمل كده لمدة دقيقة " الصحة والإسكان والزراعة والصناعة والتجارة والتعليم " وفى حاجات تانية كتـير .. ممكن نقول ده احنا هنقعد 100 سنة عقبال ما نعرف نصلح الحاجات دى .

بس برضو لو تأملت وفكرت كمان دقيقة هتلاقى أن الحل موجود فى أيدينا واحنا اللى مش بنفكر فيه , أكيد طبعاً هتقولى ايه هو الحل اللى هيظبط الصحة والإسكان والزراعة والتجارة والصناعة .
هقولك الحل هو التعليم , أيوه تطوير التعليم .. التعليم أصلاً ممكن يصلحلك كل ده لأنه بينور العقول كده ويشيل أى صدى جواها , وشىء طبيعى أصلاً أن بعد عقلك وطريقة تفكيرك ما تتطور تبقى كل حاجة فى حياتك بتتطور للأحسن وانك تفضل تسعى دايماً أنها تكون أفضل وأفضل .

وطبعاً انتوا عارفين أن التعليم اللى أنا بتكلم عليه ونفسى فيه غير التعليم اللى احنا اتعلمناه والثانوية العامة ومكتب التنسيق والغوا سنة 6 ورجعوا سنة 6 , وكمان مش التعليم اللى كل غايات الطلبة فيه انهم يدخلوا كليات طب وصيدلة وهندسة .. وفى الحقيقة هى بتكون غايات الأهل تبعاً لثقافة المجتمع اللى المفروض كمان أنها بتتورث للطلاب دول وأكيد أكيد هيعملوا كده مع أولادهم كمان 20 سنة .. بما أن كل أب بيبقى عايز أولاده يطلعوا أحسن منه .  

يعنى الموضوع موقفش على خطة تعليم مش موجودة , وإن وُجدت بتبقى فاشلة , وثقافة مجتمع عايزة تتغير وأسلوب تعليم عايز يتغير , ده كمان أكذوبة كليات القمة والقاع أصبحت شىء راسخ فى أذهان المجتمع المصرى كله .

تطوير التعليم مش صعب ومش مستحيل بس كل الحكاية انه ممكن ياخد شوية وقت .. كل المطلوب أنك تكون متفائل

وتكون واثق أن تعليمنا .. أملنا 


إرسال تعليق