الأحد، 24 أغسطس، 2014

فى ساعة متأخرة جداً من الليل


الذكرى واقفة مثبّتة المشهد
والصورة تعلى فوق ملامحها بسنين..
........................................................
ذهبت له فى ساعة متأخرة جداً من الليل لتُدرك انها لم تستيقظ..!!

........................................................
أحياناً بيكون فى صناديق زبالة قريبة مننا لكن مبنشوفهاش، وبنفضل ندوّر طول الطريق على غيرها وشايلين فى إيدينا اللى عايزين نرميه.. عشان بس نقنع نفسنا اننا بنضحى وصابرين.

........................................................
دايماً بشوف ان مفيش إختلاف كبير بين مشهد الميلاد والموت، وبعتبرهم مشهد واحد.

........................................................

معرفش ليه بحس ان الوقت ليه ملامح، ليه وجود، ليه حتى إنفعالات وردود أفعال..!!

........................................................
متحاولش توّقف الزمن دايماً، متحاولش تصوّر وتسجل كل اللى بيحصلك.. عشان أحياناً الزمن بيرفض ده، واعرف ان الإستغناء عن توثيق الحياة بيحميك من شىء هتدركه جداً فى المستقبل.

........................................................
أحياناً الخيال بيكون فيه جزء من الحقيقة، واللى صعب تعرفها مهما كان قُربك من الواقع..!!
........................................................

مش دايماً لما بتزيد المسافة بينك وبين نقطة معينة بعدت عنها بتكون الرؤية مش واضحة.. بالعكس ممكن جداً المسافة دى تخليك تشوف بشكل واضح وتعرف حجم النقطة الطبيعى والمنطقى وتقتنع أكتر بضآلتها وصغر حجمها.

........................................................

فى السينما بيكون فى بداية - وسط - نهاية، تسلسل بيحاكى مسار حياتك:
ولادة - حياة - موت

بس النهاية فى الحياة بتكون دايماً الموت، لكن فى السينما مش دايماً الموت بيكون هو النهاية،
السينما بقى بتديلك الفرصة انك تستنى لحد التتر ما يخلص، وتقعد تحلل وتفكر فى اللى حصل، الفرصة اللى عُمر الحياة ما هتديهالك أبداً.

........................................................
لحد النهاردة محدش قادر يُجزم ان الحياة قصيرة أو طويلة،، لكن محدش يقدر يختلف ان فى دايماً قدامك فرصة.

........................................................
شَبِّكت إيدى فى الهوا وناديت..
يا اللى انتِ اسمك منتهاش م الأرض..!!

........................................................
يا اللى انتِ روحك متعلقة م الطرف.. فرحانة ليه بالزخرفة ع الظرف؟

........................................................
الشمس طاحت فى المكان كله، والضحكة ذاعت صيتها ع الآخر.

..............

إرسال تعليق